Prezidentimiz Shavkat Mirziyoevtiń AQShtıń Vashington qalasına ámeliy saparınan soń, Tashkentke qaytıwı menen birinshi gezekte Qaraqalpaqstan Respublikasınıń sociallıq-ekonomikalıq rawajlanıw máselelerine baǵıshlanǵan májilis ótkergeni biz, qaraqalpaqstanlılar ushın joqarı maqtanısh hám úlken juwapkershilik bolıp tabıladı. Bul – mámleketimiz basshısınıń Aralboyı regionına bolǵan ayrıqsha itibarı hám aymaqtıń strategiyalıq áhmietin dúnya kóleminde kóre alıwınıń ayqın kórinisi bolıp esaplanadı. Atap ótilgenindey, Qaraqalpaqstan – tek ǵana úlken maydan emes, al biybaha qazılma baylıqlar ǵáziynesi bolıp esaplanadı. Májiliste keltirilgen sanlar regionımızdıń sanaat potencialın túp-tiykarınan ózgertiw ushın bekkem tiykar bola aladı. 270 million tonna cement, 256 million kub metr pardozlaw tasları, 200 million tonna hák hám basqa da kóplegen shiyki zat rezervleriniń anıqlanǵanı – bul jańa sanaat revolyuciyası degeni. “Milliy tiklanish” partiyasınıń wákilleri sıpatında biz ushın áhmietlisi – bul baylıqlardıń xalqımızdıń mápine xızmet etiwi. Keyingi 8 jıl ishinde aymaq ekonomikasınıń xalıqtıń jan basına kólemi boyınsha eń aqırǵı orınnan 7-orınǵa kóterilgeni, eksport 3,5 esege artıp, 2,1 milliard dollarǵa jetkeni reformalardıń ámeliy nátiyjesi bolıp esaplanadı. Endigi wazıypa – kelesi 5 jılda ekonomikanı 102,5 trillion sumǵa jetkeriw hám 7,2 milliard dollarlıq joybarlardı turmısqa engiziw. Mámleketimiz basshısı Qaraqalpaqstandı innovaciyalar orayına aylandırıw boyınsha revolyuciyalıq baslamalardı alǵa qoydı. Taqıyatasta modulli intellektuallıq esaplaw orayı, Nókiste avtomobil sanaatı klasteri, Qaraózekte kómirden altın ajıratıp alıw fabrikası sıyaqlı joybarlar regionımızdıń texnologiyalıq kórinisin belgilep beredi. Ásirese, jasalma intellekt tarawına 5 milliard dollar sırt el investiciyasınıń tartılıwı, IT universiteti hám startap texnoparkleriniń shólkemlestiriliwi jaslarımız ushın jańa imkaniyatlar esigin ashadı. “Milliy tiklanish” partiyası ushın ilim hám innovaciya – milliy rawajlanıwdıń bas faktorı. Sonlıqtan, Ilim hám innovaciyalar qorınan ajıratılatuǵın 30 milliard sumlıq qarjılardıń maqsetli jumsalıwı ústinen deputatlıq qadaǵalawdı kúsheytemiz. Májiliste belgilengen eń áhmietli sociallıq wazıypa – usı jıldıń aqırına shekem jumıssızlıqtı 4,2 procentke, kámbaǵallıqtı bolsa 3,2 procentke túsiriw bolıp esaplanadı. Nókis qalası, Qońırat hám Shımbay rayonların kámbaǵallıqtan jıraq aymaqqa aylandırıw, “awır” kategoriyadaǵı Bozataw, Qanlıkól, Moynaq hám Shomanay rayonlarında kámbaǵallıqtı 2 esege qısqartıw boyınsha berilgen tapsırmalar “insan qádiri ushın” principiniń ámeliy kórinisi bolıp esaplanadı. Biz, deputatlar, hár bir máhállege kirip, xalıqtıń bántligin támiyinlew, olardı isbilermenlikke baǵdarlaw hám sociallıq qorǵawǵa mútáj qatlamdı qollap-quwatlaw boyınsha sistemalı jumıs shólkemlestiremiz. Prezidentimiz tárepinen isbilermenlik ushın berilgen jeńillikler múddetiniń sozdırılıwı bolsa mıńlaǵan jańa jumıs orınlarınıń jaratılıwına xızmet etedi. Qaraqalpaqstannıń 16 million gektar paydalanılmay atırǵan jer resurslarınan paydalanıw boyınsha jańasha qatnas belgilendi. Suwsızlıqqa hám shorǵa shıdamlı dárilik shópler jetistiriw, jasalma intellekt tiykarında eginlerdi monitoring etiw – bul tek ǵana ekonomikalıq payda emes, al ekologiyalıq turaqlılıq degeni. Sharwashılıq hám jaylawlardı rawajlandırıw boyınsha Ministrler Keńesi baslıǵınıń ayrıqsha orınbasarı lawazımınıń engiziliwi tarawdaǵı mashqalalardı sistemalı sheshiwge imkaniyat beredi. Qaraqalpaqstannıń siyrek ushırasatuǵın tábiyatı hám tariyxı – úlken turistlik potencial bolıp esaplanadı. Bul – milliy mádeniyatımız hám qádiriyatlarımızdı dúnyaǵa tanıtıwdıń eń nátiyjeli jolı. 2027-jılǵa shekem Qońıratta “qurǵaq port” statusına ie Aral logistika orayınıń shólkemlestiriliwi Qaraqalpaqstandı xalıqaralıq transport koridorınıń áhmietli buwınına aylandıradı. Sonıń menen birge, ishimlik suwı hám jol qurılısına baǵdarlanatuǵın trillionlaǵan qarjılar xalqımızdıń turmıs sapasın túp-tiykarınan jaqsılaydı. Húrmetli Prezidentimizdiń tek ǵana Qaraqalpaqstan ushın 2017-jıldan berli 78 párman hám qararları qabıl etilgen bolsa, házirgi waqıtta 38 hújjettiń orınlanıwı dawam etpekte. Qabıl etilgen tariyxıy hújjetler tiykarında, xalqımızǵa, sonıń ishinde, jaslarımızǵa bir qatar qolaylı sharayatlar jaratılǵanı, isbilermenlerimizge burın bolmaǵan kóplegen jeńillik hám imkaniyatlar berilgeni, xalıqtıń awırı jeńil, uzaǵı jaqın bolǵanı, puqaralardı qıynap atırǵan mashqalalarǵa unamlı sheshim tabılǵanı mámleketimiz basshısınıń xalqımızǵa bolǵan ayrıqsha itibarı hám mehiriniń kórinisi bolıp esaplanadı. Álbette, Prezidentimiz tárepinen belgilep berilgen tiykarǵı wazıypalar Qaraqalpaqstandı jańa rawajlanıw basqıshına alıp shıǵadı. Biz, “Milliy tiklanish” demokratiyalıq partiyasınıń belsendileri hám Joqarǵı Keńes deputatları, bul reformalardıń hár bir máhálle hám hár bir shańaraqta óz kórinisin tabıwı ushın juwapkermiz. Sebebi, maqsetimiz bir: Qaraqalpaqstandı abadan, ekonomikalıq qúdiretli hám innovaciyalıq aymaqqa aylandırıw! Bul jolda barlıq imkaniyat hám resurslarımızdı jumsaymız. Tajibay Romanov, “Milliy tiklanish” demokratiyalıq partiyası Qaraqalpaqstan Respublikası keńesiniń baslıǵı, Joqarǵı Keńes deputatı.