Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasında óz baslamaları hám startap joybarları menen belsendilik kórsetip atırǵan bir topar jaslar menen ushırastı. Joqarǵı Keńes Baslıǵı dáslep mámleketimiz basshısınıń ayrıqsha itibarı menen jaslarǵa jaratılǵan imkaniyatlar haqqında keń túrde maǵlıwmat berdi. Sonıń menen birge, bunday imkaniyatlardan nátiyjeli paydalanıp, joqarı nátiyjelerge erisip atırǵan jaslardıń sanı artıp atırǵanı ayrıqsha qanaatlanıwshılıq penen atap ótildi. Atap ótilgenindey, jaqında Kóksaray rezidenciyasında Prezidentimizdiń jaslar menen sóylesiwinde mámleketimizde hár hápteniń piyshembi kúni ministrlikler, uyımlar hám hákimliklerde “Jaslar kúni” bolıwı belgilendi. Sol kúni tarawǵa juwapker basshılar máhálle, mektep hám texnikumlarǵa barıp, jaslardı tıńlaydı hám mashqalasın sheshedi. Sonıń ishinde, barlıq dárejedegi basshılar jaslardı til hám kásip-ónerge úyretiw, sportqa tartıw, ideya, joybar hám startaplarına járdem beriw, olardı jumıslı hám dáramatlı etiw boyınsha jáne de jedel islewi, birde-bir jigit-qızdı itibardan shette qaldırmawı zárúr ekenligi atap ótildi. Ushırasıw dawamında jaslardıń bántligin támiyinlew, isbilermenligin jolǵa qoyıw, óz ideyaların ámelge asırıwı ushın mámleketimiz basshısı tárepinen jaratıp berilgen imkaniyatlar hám ayrıqsha jeńillikler haqqında juwapkerler tárepinen maǵlıwmat berildi. Óz gezeginde, jaslar Prezidentimizdiń bunday joqarı isenimi hám jaslarǵa kórsetip atırǵan atalarsha ǵamqorlıǵı ushın ózleriniń tereń minnetdarshılıǵın bildirdi. Ashıqtan-ashıq sóylesiw tárizinde ótkerilgen ushırasıwda jaslar tárepinen bir qatar áhmietli baslamalar bildirildi. Olar tárepinen bildirilgen hár bir usınıs itibarǵa alınıp, bul ideyalardı turmısqa engiziw boyınsha juwapkerlerge anıq tapsırma berildi. D.Abibullaev.