Mámleketimizde jaslarǵa baylanıslı mámleketlik siyasat sońǵı jıllarda pútkilley jańa mazmun hám sapa basqıshına kóterildi. Mámleketimiz basshısı Shavkat Mirziyoevtiń Kóksaray rezidenciyasında jaslar menen ótkergen ashıq hám qızǵın sóylesiwi bul baǵdardaǵı jumıslardı jańa basqıshqa alıp shıqtı. Ushırasıwda jaslardıń baslamaların qollap-quwatlaw, olardıń bántligin támiyinlew, zamanagóy kásip-óner hám isbilermenlik kónlikpelerin qáliplestiriw, innovaciyalıq ideyaların xoshametlew tiykarǵı wazıypa sıpatında belgilep alındı. Bul bolsa jaslar máselesi mámleketlik siyasat dárejesindegi eń áhmietli baǵdarlardan biri ekenin jáne bir márte kórsetti.

Búgingi globallasıw hám sanlı transformaciya sharayatında hár bir mámlekettiń rawajlanıwı, bárinen burın, insan kapitalına baylanıslı. Zamanagóy bilim, shet tiller, málimleme texnologiyaları hám sanlı kónlikpelerdi puqta ielegen jaslar ǵana miynet bazarında básekige shıdamlı bola aladı. Sol sebepli elimizde jaslardıń sapalı bilim alıwı, óz potencialın tolıq kórsetiwi, ilimiy hám ámeliy jumıs penen shuǵıllanıwı ushın keń imkaniyatlar jaratılmaqta. Prezidentimiz tárepinen alǵa qoyılǵan baslamalar áyne hár bir jastıń turmısta óz ornın tabıwı, múnásip dáramat dáregine ie bolıwı hám jámiettiń rawajlanıwına úles qosıwına qaratılǵanı menen áhmietli bolıp esaplanadı.

Ájiniyaz atındaǵı Nókis mámleketlik pedagogikalıq institutında da usı wazıypalardı ámelge asırıwǵa ayrıqsha itibar qaratılmaqta. Búgingi kúnde 13 mıńnan aslam student bilim alıp atırǵan institutta bilimlendiriwdiń sapasın arttırıw, ámeliy kónlikpelerdi bekkemlew hám studentlerdiń básekige shıdamlılıǵın támiyinlew tiykarǵı maqset etip belgilengen. Atap aytqanda, shet tilleri, málimleme texnologiyaları, sanlı sawatlılıq hám zamanagóy kásiplerge baǵdarlanǵan qosımsha kurslar shólkemlestirilgen bolıp, bul kurslar studentlerdiń bilim sheńberin keńeytiw menen birge, olardı miynet bazarı talaplarına sáykes qánige sıpatında tayarlawǵa xızmet etpekte.

Jaslar isbilermenligin rawajlandırıw máselesi de turaqlı itibar orayında. Institutta pitkeriwshi basqısh studentleriniń bántligin támiyinlew, olardıń biznes baslamaların qollap-quwatlaw maqsetinde “Keleshekke qádem” orayı nátiyjeli jumıs alıp barmaqta. Oray sheńberinde “Biznes ideyadan tayar joybarǵa shekem” temasında ótkerilip atırǵan seminar-treningler studentlerdiń isbilermenlik kónlikpelerin qáliplestiriwde úlken áhmietke ie bolmaqta. Olarda bank qánigeleri, qarjı tarawınıń ekspertleri hám tájiriybeli isbilermenler qatnasıp, jaslarǵa biznes-reje dúziw, joybardı qarjılandırıw, grant hám kredit qarjıların tartıw mexanizmleri boyınsha ámeliy másláhátler bermekte.

Ámeliy nátiyjeler de salmaqlı. Házirgi kúnge shekem 69 studentke jámi 2 milliard 220 million sumǵa shamalas kredit qarjıları ajıratılıp, olar túrli tarawlarda óz isbilermenlik jumısın basladı. Bul baslamalar arqalı jańa jumıs orınları jaratılmaqta, xızmet kórsetiw hám óndiris tarawlarında jańa joybarlar ámelge asırılmaqta. Eń áhmietlisi, jaslarda erkin pikirlew, juwapkershilik hám ekonomikalıq belsendilik kónlikpeleri qáliplespekte.

Sonıń menen birge, institutta studentlerdiń ilimiy potencialın arttırıwǵa da úlken itibar qaratılǵan. Ilimiy dógerekler, ámeliy konferenciyalar, innovaciyalıq ideyalar tańlawları turaqlı ótkerip kelinedi. Studentlerdiń ilimiy qollanbaların óndiris penen baylanıstırıw, ámeliyat bazaların keńeytiw, mentorlıq sistemasın engiziw boyınsha da anıq ilajlar ámelge asırılmaqta. Bul bolsa ilim hám óndiristiń integraciyasın támiyinlew, jaslardıń teoriyalıq bilimlerin ámeliyat penen úylestiriwge xızmet etpekte.

Volontyorlıq háreketleri, ekologiyalıq baslamalar hám ruwxıy-aǵartıwshılıq ilajlar da jaslardıń belsendiligin arttırıwda áhmietli orın ieleydi. Jas áwladtıń jámietlik turmısta belsene qatnasıwı, keleshekte juwapkershilikli, intaker hám watansúygish kadrlardıń jetilisiwin támiyinleydi.

Álbette, jaslar ushın jaratılıp atırǵan keń imkaniyatlar olardıń umtılısı, miynet súygishligi hám kúsh-ǵayratı menen únles bolǵanda ǵana joqarı nátiyje beredi. Hár bir student óz aldına anıq maqset qoyıp, bilim hám kónlikpesin turaqlı arttırıp barıwı, jańalıqqa umtılıwı zárúr. Joqarı bilimlendiriw mákemeleriniń jámááti bolsa mámleket basshısı belgilep bergen wazıypalardı ámelge asırıwda belsene qatnasıp, jaslardıń hár bir iygilikli baslamasın qollap-quwatlawı kerek.

Sebebi, Jańa Ózbekstannıń erteńgi kúni – bilimli, intaker hám watansúygish jaslardıń qolında bolıp, olardıń rawajlanıwınıń sheshiwshi kúshi bolıp esaplanadı.

Alisher Ubbiev,
Ájiniyaz atındaǵı Nókis mámleketlik pedagogikalıq institutınıń rektorı.
Qaraqalpaqstan xabar agentligi