Nókis qalasında awır turmıslıq jaǵdayǵa túsip qalǵan analar hám balalardı qollap-quwatlawǵa qaratılǵan “Ana úyi” resurs orayı jumıs basladı. Mehir hám úmit mákanı sıpatında shólkemlestirilgen bul oray sociallıq qorǵawǵa mútáj shańaraqlarǵa hár tárepleme járdem kórsetiw, balalardıń shańaraq ortalıǵında tárbiyalanıwın támiyinlew hám analardı erkin turmısqa tayarlawǵa xızmet etedi.
Prezident janındaǵı Sociallıq qorǵaw milliy agentliginiń Qaraqalpaqstan Respublikası basqarmasınıń baslaması menen shólkemlestirilgen bul oraydıń ashılıw máresiminde shıǵıp sóylegenler elimizde ámelge asırılıp atırǵan sociallıq reformalar, ásirese, hayal-qızlar hám balalardı qollap-quwatlawǵa qaratılǵan baǵdarlamalar insan qádirin ulıǵlawǵa xızmet etip atırǵanın atap ótti.
“Ana úyi” resurs orayınıń jumısı Ramazan ayı baslanıwı aldınan jolǵa qoyılǵanın atap ótiw orınlı. Bul bolsa jaqsılıq, saqawat hám adamgershilik ideyaları jáne de kúsheyip atırǵan házirgi waqıtta mútáj shańaraqlarǵa járdem beriw jumıslarına jańa pát baǵıshladı.
Mehir hám úmit mákanı sıpatında táriyiplenip atırǵan bul oraydı shólkemlestiriwden tiykarǵı maqset – balalardıń sociallıq jetimlikke túsip qalıwınıń aldın alıw, olardıń shańaraq ortalıǵında tárbiyalanıwın támiyinlew jáne awır turmıslıq jaǵdayǵa túsip qalǵan analardı hár tárepleme qollap-quwatlawdan ibarat.
Búgingi kúnde “Ana úyi” joybarı elimizdiń bir qatar aymaqlarında basqıshpa-basqısh ámelge asırılmaqta. Dáslep Tashkent hám Samarqand qalalarında shólkemlestirilgen bul oraylar keyin ala Buxara, Quvasay sıyaqlı aymaqlarda da ashılıp, awır jaǵdayǵa túsip qalǵan hayal-qızlar hám balalardı qollap-quwatlaw jumısları jolǵa qoyıldı. Dáslepki nátiyjelerge bola, oraylardıń jumısı sebepli onlaǵan hayal-qızlar qıyın turmıslıq jaǵdaydan shıǵıwǵa járdem aldı, derlik 60 balanıń ana qushaǵınan ayırılıwınıń aldı alındı.
– “Ana úyi” orayınıń tiykarǵı maqseti awır turmıslıq jaǵdayǵa túsip qalǵan analardı qollap-quwatlaw hám balalardıń shańaraq ortalıǵında tárbiyalanıwın támiyinlewden ibarat, – deydi oraydıń koordinatorı Angela Umirova. – Bul jerde analar perzentleri menen birge waqtınsha jasap, qánigeler tárepinen hár tárepleme járdem aladı. Orayda olarǵa turaq jay, azıq-awqat, kiyim-kenshek, medicinalıq xızmet, psixologiyalıq hám huqıqıy másláhátler kórsetiledi.
Sonday-aq, analardı erkin turmısqa tayarlaw, olardı jumıs penen támiyinlew hám kásip-ónerge úyretiwge de ayrıqsha itibar qaratılmaqta.
Ramazan ayı baslanıwı menen Qaraqalpaqstan Respublikasında xalıqtıń sociallıq qorǵawǵa mútáj qatlamların qollap-quwatlaw jumısları jáne de jedellesti. Sonıń ishinde, sociallıq reestr arqalı “Mámleket támiynatındaǵı shańaraq” hám “Kámbaǵal shańaraq” kategoriyasına kirgizilgen shańaraqlarǵa bir mártelik materiallıq járdemler ajıratılmaqta.
– Ramazan ayı dawamında Qaraqalpaqstan Respublikası boyınsha 55 mıń 306 shańaraqtı qollap-quwatlaw maqsetinde materiallıq járdemler berildi, – deydi Ózbekstan Respublikası Prezidenti janındaǵı Sociallıq qorǵaw milliy agentligi Qaraqalpaqstan Respublikası basqarmasınıń sociallıq tólemler sektorınıń baslıǵı Naǵmet Ǵaniev. – Bul processte sociallıq xızmetkerler xalıqqa óz waqtında hám sapalı xızmet kórsetiw maqsetinde belsene qatnaspaqta.
Sonday-aq, Xojeli rayonında da Ramazan ayı múnásibeti menen awır jaǵdayda bolǵan, xirurgiyalıq operaciyaǵa mútáj bolǵan nawqaslarǵa arnawlı medicinalıq vaucherler tapsırıldı. Bul vaucherler arqalı nawqaslar qánigelestirilgen medicina mákemelerinde zárúr medicinalıq tekseriwden ótkerilip, emleniw imkaniyatına ie bolmaqta.
Puqaralardıń minnetdarshılıq sózleri bunday qayırlı isler jámiette insanıylıq hám óz-ara miyrim-shápáát principleri bekkemlenip atırǵanınan dárek bermekte.
Juwmaq ornında aytıw múmkin, Nókis qalasında “Ana úyi” resurs orayınıń ashılıwı hám Ramazan ayı dawamında ámelge asırılıp atırǵan qayırqomlıq ilajları mútáj insanlarǵa ámeliy járdem kórsetiw menen birge jámiette miyrim-shápáát, keńpeyillik hám sociallıq awızbirshilik ortalıǵın jáne de bekkemlewge xızmet etpekte. Bul bolsa elimizde “insan qádiri ushın” principi turmısta óz kórinisin tawıp atırǵanınıń ayqın kórinisi bolıp esaplanadı.
Ǵ.OTAJANOV.