Insan qádiri ulıǵlanǵan elde hár bir puqaranıń abadan jasawı, sociallıq qorǵawǵa mútáj qatlamlardı qollap-quwatlaw mámleketlik siyasattıń tiykarǵı baǵdarına aylanadı. Xalqımız ázelden máhálle aqsaqallarınıń násiyatlarına, turmıslıq tájiriybesine súenip is tutqan. Awır demlerde kekselerdiń pátiyası hám jol-jobaları menen múshkilin jeńilletken. Búgingi kúnde bul dástúr jańasha mazmunǵa ie bolıp, sistemalı reformalardıń ajıralmas bólegine aylandı. Mámleketimiz basshısınıń 2024-jıl 25-noyabrdegi “Kámbaǵallıqtan abadanlıqqa qaray” baǵdarlamasın ámelge asırıwǵa belsendi nuranıylardı tartıw ilajları haqqında”ǵı qararı mine usınday iygilikli maqsetlerge xızmet etip atırǵan áhmietli hújjet boldı.
Usı qarar tiykarında 2025-jıldıń yanvar ayınan baslap mámleketimizdiń hár bir máhállesinde úshten bay turmıslıq tájiriybege ie bolǵan belsendi nuranıylardıń hár birine besewden kámbaǵal shańaraq biriktirildi. Bul tek ǵana materiallıq járdem emes, al sociallıq-ruwxıy ortalıqtı salamatlandırıw, mútáj shańaraqlardı ruwxıy qollap-quwatlaw hám olardı miynet arqalı joqarı nátiyjelerge baǵdarlaw degeni. Bul iygilikli baslama Ámiwdárya rayonında da keńnen en jayıp, kóplegen shańaraqlarǵa quwanısh hám qut-bereket alıp kelmekte.
Rayonnıń Mańǵıt qalasındaǵı Durunki máhállesinde jasaytuǵın Muxtar Haytakovtıń shańaraǵı bir waqıtları kámbaǵal shańaraqlar reestrinde edi. Bul shańaraqtıń abadanlıqqa qaray taslaǵan dáslepki qádemlerinde nuraniy ana Omongul Qayupovanıń xızmetleri sheksiz. Juwapker sıpatında biriktirilgen ana bárinen burın shańaraqtıń ishki imkaniyatların úyrendi, olardıń dárt-táshwishlerine sherik boldı. Kórsetilgen ámeliy járdem nátiyjesinde shańaraq baslıǵı hám onıń ómirlik joldası turaqlı jumıs ornına iye boldı. Sonday-aq, “Máhálle jetiligi” menen birgelikte shańaraqta qusshılıq jumısı jolǵa qoyıldı. Búgingi kúnde bul shańaraq tek ǵana kámbaǵallıq reestrinen shıǵarılıp qalmastan, al óz miyneti arqalı turaqlı dáramat dáregin jaratıwǵa eristi. Nuraniylardıń hár bir shańaraqqa kirip barıwı, shańaraq aǵzaları menen ushırasıp, olardıń mashqalaların sheshiwge járdem beriwi jámiette awızbirshilik hám miyrim-shápáát baylanısların bekkemlemekte.
Tap usınday unamlı ózgerislerdi Almazar máhállesinde jasaytuǵın Dilbar Atajanovanıń shańaraǵı mısalında da kóriw múmkin. Bul shańaraqqa máhálle belsendisi Ozod Madraimov juwapker etip biriktirilgen. Onıń usınısı hám “Máhálle jetiligi”niń járdemi menen shańaraqtıń elektr energiyasına bolǵan talabın qaplaw hám qárejetlerdi azaytıw maqsetinde shańaraqqa quyash panelleri ornatıp berildi. Jeńilletilgen kredit ajıratıldı hám sharwa malları satıp alındı. Házirgi waqıtta shańaraqta sharwashılıq keńeytilip, ruwzıgershiliktiń kemshiligi tolıqtırılmaqta.
Sanlarǵa itibar qaratatuǵın bolsaq, “Kámbaǵallıqtan abadanlıqqa qaray” baǵdarlamasınıń orınlanıwı rayonda qanshelli nátiyjeli baratırǵanınıń gúwası bolasız. Atap aytqanda, 2025-jıldıń birinshi basqıshında 138 nuranıyǵa 668 shańaraq, ekinshi basqıshında bolsa 144 nuranıyǵa 719 shańaraq biriktirildi. Alıp barılǵan ilajlar nátiyjesinde tek ǵana 2025-jıldıń ózinde jámi 664 shańaraq kámbaǵallıqtan shıǵarıldı.
Baǵ máhállesinde jasawshı Azamat Twraevtıń shańaraǵı da búgin kámbaǵal shańaraqlar reestrinde joq. Oǵan juwapker Qurolbay Eshchanov shańaraqtıń isbilermenlikke bolǵan qızıǵıwshılıǵın durıs baǵdarlay aldı. Kórsetilgen ámeliy járdem hám bankten alınǵan kredit esabınan Azamat Twraev sharwa mallarınıń sanın kóbeytiwge eristi. Bul menen sheklenip qalmastan, kishi óndiris cexın da shólkemlestirdi. Bul bolsa shańaraqtıń ekonomikalıq qúdiretin arttırıw menen birge, jańa jumıs orınlarınıń jaratılıwına da xızmet etpekte.
Usı máhállede jasaytuǵın Marhabo Haytakovanıń shańaraǵına tájiriybeli nuranıy Zulfiya Ollayarova juwapker. Bul jerde de sistemalı qatnas óz nátiyjesin berdi: shańaraq kredit qarjıları esabınan sharwashılıqtı keńeytip, kámbaǵal shańaraqlar reestrinen shıǵarıldı.
Búgingi kúnde Ámiwdárya rayonında bul iygilikli jumıslar dawam ettirilmekte. 2026-jıldıń birinshi shereginde 144 nuranıyǵa 720 shańaraq biriktirilip, olardı kámbaǵallıqtan shıǵarıw boyınsha ámeliy rejeler turmısqa engizilmekte.
Shańaraqlardıń ózin-ózi bánt etiwi ushın jeńilletilgen kreditler ajıratılıwı, nuranıylardıń qıytaq jerden únemli paydalanıw hám miynet tártibi baǵdarındaǵı másláhátleri kámbaǵallıqqa qarsı gúresiwde tiykarǵı faktor bolıp xızmet etpekte.
Nuraniylar arqalı olarǵa biriktirilgen hár bir shańaraqta salamat ruwxıy ortalıq ornap, shańaraq aǵzalarında miynetke bolǵan qızıǵıwshılıq hám erteńgi kúnge isenim payda bolmaqta. Bul sistema nátiyjesinde óz dáramatına ie bolǵan, jasaw sharayatları jaqsılanǵan watanlaslarımız jaratılǵan imkaniyatlar hám kórsetilip atırǵan itibar ushın Prezidentimizge ózleriniń shın júrekten minnetdarshılıǵın bildirmekte.
Sebebi, xalıqtıń razılıǵı reformalardıń joqarı maqseti. Nuraniylardıń pátiyası hám jaslardıń kúsh-ǵayratı bolsa abadan keleshek girewi bolıp esaplanadı.
Bekman ALLABERGANOV,
“Nuraniy” qorınıń Ámiwdárya rayonlıq bóliminiń baslıǵı.
