Mámleketimizde insan qádirin ulıǵlaw, shańaraq institutın bekkemlew hám turaqlı sociallıq ortalıqtı támiyinlew baǵdarında izbe-iz reformalar ámelge asırılmaqta. Usı baǵdarda Ózbekstan Respublikası Prezidentiniń 2026-jıl 3-marttaǵı 33-sanlı “Hayal-qızlar hám balalar huqıqlarınıń qorǵalıwın kúsheytiw jáne olarǵa bolǵan kúsh kórsetiw hám zorlıq jaǵdaylarınıń aldın alıw boyınsha qosımsha shólkemlestiriwshilik-huqıqıy ilajlar haqqında”ǵı pármanı ayrıqsha áhmiyetke iye bolmaqta. Bul pármannıń tiykarǵı maqseti – hayal-qızlar hám balalar huqıqların nátiyjeli qorǵaw, shańaraqlıq zorlıq hám kúsh kórsetiw jaǵdayların azaytıw, jábirlengenlerge operativ hám kompleksli járdem kórsetiw sistemasın jaratıwdan ibarat. Pármannıń orınlanıwın támiyinlew maqsetinde aymaqlarda ámeliy jumıslar keń kólemde jolǵa qoyılǵan. Atap aytqanda, Ellikqala rayonında Shańaraq hám hayal-qızlar bólimi jáne Ruwxıylıq orayı menen birgelikte jumısshı toparlar shólkemlestirilgen bolıp, máhállelerde xalıq penen turaqlı sóylesiwler ótkerilmekte. Bul processte pármannıń mazmun-mánisin túsindiriw, xalıqtıń huqıqıy mádeniyatın arttırıw, shańaraqlarda salamat ortalıqtı qáliplestiriw hám erte turmıs jaǵdaylarınıń aldın alıwǵa ayrıqsha itibar qaratılmaqta. Bilimlendiriw mákemelerinde de profilaktikalıq jumıslar sistemalı túrde shólkemlestirilgen. Atap aytqanda, 11-ulıwma orta bilim beriw mektebi, 23, 61 hám 66-ulıwma orta bilim beriw mekteplerinde oqıwshılardıń qatnasıwında dógerek sáwbetleri, ushırasıwlar hám aǵartıwshılıq ilajlar ótkerildi. Olarda “Zorlıqqa jol qoyılmaydı,” “Shańaraq – muqaddes qorǵan,” “Zorlıq-zombılıqsız baxıtlı ómir” sıyaqlı temalarda túsindiriw jumısları alıp barılıp, jaslarǵa óz huqıqların biliw, múrájat etiw tártibi hám shańaraqlıq qatnasıqlarda óz-ara húrmet hám juwapkershiliktiń áhmieti haqqında hár tárepleme maǵlıwmat berildi. Sonday-aq, Amirobod, Sharq yulduzi, Navoiy, Tozaboǵ, Sarabiy hám Qirqqiz obod máhállelerinde xalıq penen ushırasıwlar shólkemlestirildi. Olarda huqıqıy mádeniyattı arttırıw, erte turmıstıń unamsız aqıbetleri hám shańaraqlıq kelispewshiliklerdiń aldın alıw máseleleri keńnen dodalandı. Ásirese, qız balalardı erkin turmısqa tayarlaw, olardı milliy qádiriyatlarǵa húrmet ruwxında tárbiyalawǵa ayrıqsha itibar qaratılmaqta. Qánigelerdiń atap ótiwinshe, zorlıqqa qarsı gúres tek ǵana huqıqıy ilajlar menen sheklenip qalmastan, jámiettiń sanası, mánawiyatı hám sociallıq juwapkershiligi menen únles halda alıp barılıwı kerek. Juwmaq ornında aytıw kerek, hayal-qızlar hám balalar huqıqların qorǵaw tek ǵana mámleketlik siyasattıń tiykarǵı baǵdarı emes, al jámiettiń ruwxıy jetikligi hám keleshekke bolǵan juwapkershiligi bolıp esaplanadı. Hár bir qorǵalǵan hayal – baxıtlı shańaraq, hár bir qorǵalǵan shańaraq bolsa turaqlı jámiet degeni. Sol sebepli zorlıqqa qarsı gúresiw, erte turmıstıń aldın alıw hám salamat ortalıqtı qáliplestiriw hár birimizden qatnasıwshılıq hám belsendilikti talap etedi. Sebebi millet táǵdiri – hayal qádiri hám bala baxıtı menen tıǵız baylanıslı. Aysha MATNIYAZOVA, Respublikalıq Ruwxıylıq hám aǵartıwshılıq orayı Ellikqala rayonlıq bóliminiń baslıǵı.