Awıl xojalıǵı tarawı tek ǵana ekonomikamızdıń súenishi emes, al mámleketimiz azıq-awqat qáwipsizliginiń bas kepili bolıp esaplanadı. Sonlıqtan, agrar tarmaqta miynet etip atırǵan hár bir jumısshı-xızmetker, fermer hám qıytaq jer iesiniń huqıqıy hám sociallıq qorǵalıwın támiyinlew – mámleketimiz siyasatınıń tiykarǵı baǵdarlarınan biri bolıp esaplanadı. Bul baǵdarda Ózbekstan Agrosanaat kompleksi xızmetkerleri kásiplik awqamı tarmaq sisteması tárepinen xızmetkerlerdi aǵzalıqqa tartıw hám olardıń nızamlı máplerin qorǵaw boyınsha keń kólemli reformalar ámelge asırılmaqta.
Mámleketimiz basshısı Sh.Mirziyoevtiń 2025-jıl 17-oktyabrde kásiplik awqamlarınıń belsendileri hám veteranları menen bolıp ótken ushırasıwı tarawdıń rawajlanıwında jańa dáwirdi baslap berdi.
Tiykarǵı wazıypalar izbe-izliginiń logikalıq dawamı sıpatında, usı jılǵı rejeler “2026-jıl – Máhálleni rawajlandırıw hám jámietti joqarılatıw” jılı mámleketlik baǵdarlamasında da óz kórinisin taptı.
Usı wazıypalardıń orınlanıwın támiyinlew maqsetinde Qaraqalpaqstan Respublikasında jergilikli hákimlikler menen tıǵız sociallıq birge islesiw jolǵa qoyıldı. Alıp barılǵan úgit-násiyatlaw hám shólkemlestiriw jumısları nátiyjesinde, usı jıldıń fevral-mart aylarında tarmaq sistemasında jumıs alıp barıp atırǵan 3 507 fermer xojalıǵı qamtıp alındı. Bul xojalıqlarda miynet etip atırǵan 12 521 jumısshı-xızmetkerdiń tilek hám tilekleri úyrenilip, jańadan 103 aymaqlıq baslanǵısh kásiplik awqamı shólkemleri shólkemlestirildi. Bul kórsetkish mıńlaǵan atız miynetkeshleriniń óz huqıqların kásiplik awqamları arqalı qorǵawǵa bolǵan isenimi artıp baratırǵanınan dárek beredi.
Jańadan shólkemlestirilgen 103 aymaqlıq fermer xojalıqları baslanǵısh kásiplik awqamı shólkemlerinde jumıs sistemasın durıs jolǵa qoyıwdıń huqıqıy tiykarı jaratıldı. Atap aytqanda, olardıń barlıǵında jámáát shártnamaları qabıl etilip, nızamshılıqta belgilengen tártipte ekspertizadan hám dizimnen ótkerildi. Shártnamalardı dúziwde qurǵaq rásmiylestiriwden pútkilley waz keship, nızamda kórsetilgen hár bir bólim – miynetke haqı tólew, dem alıs waqtı hám sociallıq jeńillikler fermer xojalıǵı jumısshıları menen tikkeley atız basında, ashıqtan-ashıq sóylesiw túrinde dodalandı. Jumıs beriwshiler hám kásiplik awqamı arasındaǵı óz-ara maqul kelisimlerden soń ǵana bul hújjetler tastıyıqlandı.
Házirgi kúnde jańadan shólkemlestirilgen baslanǵısh shólkemlerde shártnamalarda belgilengen bántlerdiń orınlanıwın támiyinlew basqıshı jedellik penen alıp barılmaqta. Házirgi waqıtta jumısshı-xızmetkerler hám olardıń perzentlerin sistemalı túrde salamatlandırıw, salamatlandırıw orınlarına jollamalar ajıratıw, atız miynetkeshleriniń bos waqıtların mazmunlı shólkemlestiriw maqsetinde mádeniy-aǵartıwshılıq ilajlar jáne sport jarısların ótkeriwge ayrıqsha itibar qaratılmaqta. Sonday-aq, dala sharayatında jumıs islep atırǵan xızmetkerler ushın múnásip sharayatlar jaratıw, olardı arnawlı kiyim-kenshek hám qorǵanıw quralları menen támiyinlew arqalı miynetti qorǵawdı kúsheytiw ilajları kórilmekte.
Biz, kásiplik awqamları, awıl xojalıǵında miynet etip atırǵan hár bir insandı qádirleymiz. Ol basshı xızmetker bola ma, mexanizator, suwshı, sharwa yamasa ápiwayı jumısshı bola ma – olardıń nızamlı huqıqların qorǵaw tiykarǵı minnetimiz bolıp esaplanadı. Jumısshılarımızdıń, olardıń ata-anaları hám perzentleriniń densawlıǵın tiklew hám qorǵawda qanshelli belsendi hám awızbirshilikli bolsaq, Jańa Ózbekstannıń azıq-awqat qáwipsizligin támiyinlew hám elimiz abadanlıǵın arttırıwǵa sonshelli úlken úles qosqan bolamız.
Erǵali SEYITNAZAROV,
Ózbekstan Agrosanaat kompleksi xızmetkerleri kásiplik awqamı Respublikalıq keńesiniń Qaraqalpaqstan Respublikası boyınsha juwapker shólkemlestiriwshisi.
