Mámleketimizde búgingi kúnde mádeniyat, kórkem óner hám ádebiyat tarawına qaratılıp atırǵan itibar hám ǵamqorlıq óz nátiyjesin bermekte. Prezidentimizdiń usı jıl 2-iyundegi “Mádeniyat, kórkem óner hám ádebiyat tarawların bunnan bılay da rawajlandırıw boyınsha keń kólemli ilajlar haqqında”ǵı pármanı bul baǵdarda áhmiyetli qádem boldı. Ásirese, pármanda belgilengen keń kólemli ilajlar taraw wákillerin ruwxlandırıp, jumısqa, dóretiwshilikke bolǵan juwapkershiligin jáne de arttırmaqta.
Xojeli rayonında jumıs alıp barıp atırǵan “Mery dance school” mektebinde tárbiyalanıp atırǵan jaslardıń erisip atırǵan jetiskenlikleri tek ǵana mámleketimizde emes, al xalıqaralıq kólemde de keńnen tán alınbaqta. Atap aytqanda, jaqında Qırǵızstan Respublikasınıń Bishkek qalasında bolıp ótken VI Xalıqaralıq “Nariste” atamasındaǵı jaslar folklor festivalında usı mektep tárbiyalanıwshıları belsene qatnasıp, arnawlı sertifikat penen sıylıqlandı. Sonday-aq, “Mery dance school” mektebiniń tiykarın salıwshısı Merixan Utexanovaǵa Italiya mámleketinde xoreograflar arasında ótkeriletuǵın festivalǵa jollama berildi. Awa, búgin mekteptiń bunday jetiskenlikleri oǵada kóp.
2024-jılı rayonlıq “Mik rokreditbank”tiń jeńilletilgen kredit qarjıları tiykarında óz jumısın baslaǵan bul mektepte kórkem gimnastika, milliy hám zamanagóy ayaq oyınlar, folklor ayaq oyınları sıyaqlı 10 baǵdarda 116 ul-qız tájiriybeli trener-oqıtıwshılardan kórkem óner sırların úyrenip kelmekte. Mektepke oqıwshılar tiykarınan 4 jastan baslap qabıl etiledi. Pitkeriwshilerge sertifikat beriledi. Itibarlı tárepi, bul jerde úlken jastaǵı hayal-qızlar ushın muzıka terapiyası da shólkemlestirilgen. Onda hayal-qızlarımızǵa gózzal hám salamat turmıs tárizine ámel etiw boyınsha sabaqlar ótiledi.
– Hár bir millet hám xalıqlardı dúnyaǵa tanıtıwda mádeniyat hám kórkem ónerdiń ornı ayrıqsha, – deydi “Mery dance school” mektebiniń direktorı Merixan Utexanova. – Mádeniyat, kórkem óner hám ádebiyatqa itibar qaratılǵan mámlekette álbette rawajlanıw boladı. Biz de mine usınday itibardan ilhamlanǵan halda mádeniyatımız hám kórkem ónerimizdi bunnan bılay da rawajlandırıw, dúnya kólemine alıp shıǵıw, milliyligimizdi ulıǵlaw, jas áwladqa kásiptiń sırların úyretiw, olarda kórkem ónerge bolǵan qızıǵıwshılıq oyatıw, qábiletin júzege shıǵarıwǵa járdemlesiw, xalıqaralıq maydanda mektebimiz brendin jaratıwdı maqset etkenbiz. Balalıqtaǵı ármanlarım búgin úlken reje hám maqsetlerge tutasqanınan oǵada quwanıshlıman, – deydi sáwbetlesimiz.
Haqıyqatında da, Merixonnıń mine usınday umtılıs hám izleniwleri óz nátiyjesin bermekte. Jumısına ele kóp waqıt bolmaǵan bolsa da mektep oqıwshıları mámleket kóleminde ótkerilip kiyatırǵan tańlaw, festivallarda múnásip orınlardı ielep kelmekte. Sonıń ishinde, 2024-jıldıń 29-iyun kúni Tashkent qalasında ótkerilgen “Uzori Aziya” xalıqaralıq tańlawında mektep komandası eń joqarı sıylıq – gran-pri iesi boldı. Bunnan tısqarı, oktyabr ayında Tashkent qalasında bolıp ótken “Dance battle” xalıqaralıq tańlawında sıylı 1-orındı ielep, “Eń jaqsı xoreograf” nominaciyasına ie boldı. Sonday-aq, ótken jılı iyun ayında ótkerilgen “Summer fest Tashkent” xalıqaralıq tańlawında komandalıq hám jeke túrde gran-pri iesi boldı. Onda 10-15 jas kategoriyasında A.Dunesbaeva hám 20-25 jas kategoriyasında A.Dunesbaeva, D.Berdanova, Z.Jumanazarovalar joqarı sıylıqtı qolǵa kirgizdi.
Merixonnıń mektepten tısqarı bilimlendiriwdiń sapasın arttırıw, jaslardı kásipke tayarlaw baǵdarındaǵı bir qatar usınısları, sonday-aq, isbilermenlikti rawajlandırıwdaǵı joybar hám baslamaları keń jámiechilik tárepinen qollap-quwatlanbaqta. Ol ótken jılı YAponiyanıń isbilermenlik baǵdarındaǵı jetik qánige hám professorların tartqan “Yori-I” joybarı sheńberinde mentorlıq oqıwǵa qabıl etildi hám sertifikatqa ie boldı.
Túrli ilajlarda belsene qatnasqanı, jas áwladtı watansúyiwshilik ruwxında tárbiyalaw, olardı óz qızıǵıwshılıǵı hám qábiletine bola kásip-ónerge baǵdarlaw jumıslarına qosqan múnásip úlesi ushın ol ótken jıldıń iyun ayında Qaraqalpaqstan Respublikası Joqarǵı Keńesi Prezidiumınıń qararına muwapıq “Úmit ushqını” kókirek belgisi menen sıylıqlandı.
Haqıyqatında da, elimizde dóretiwshilerdi qollap-quwatlaw hám qábilet ielerin xoshametlew baǵdarında sistemalı jumıslar alıp barılıp atırǵan sayın, Merixan sıyaqlı jaslarımızdıń qatarı barǵan sayın kóbeyip baradı.
Feruza NURULLAEVA.
