Búgingi kúnde elimizde ǵalaba xabar quralların qollap-quwatlaw, sóz erkinligin támiyinlew, mámleketlik uyımlar jumısınıń ashıq-aydınlıǵın keńeytiw, jámietimizde júz berip atırǵan waqıya-hádiyselerdi jedel hám qalıs sáwlelendiriw, xalıqtı isenimli málimleme menen támiyinlew, media tarawın bunnan bılay da reformalaw baǵdarında keń kólemli ilajlar ámelge asırılmaqta. Mine usınday qızǵın dóretiwshilik processte Qaraqalpaqstan radiokanalınıń da ornı ayrıqsha bolıp atırǵanı, álbette, biz jurnalistlerdi jáne de ilhamlandırmaqta. Qaraqalpaqstan radiokanalında jumıs islep atırǵanıma 20 jıldan astı. Bul dáwir ishinde júdá kóplegen esittiriwler tayarlawǵa eristim. “Házireti diyqan,” “Dáwir nápesi,” “Xalıq penen sáwbet,” “Awıl turmısı,” “Ilim – jámiet rawajlanıwınıń tiykarı,” “Ilimnen sanaatqa,” “Ilim hám jámiet,” “Ayrıqsha jaǵday” sıyaqlı kórsetiwler usılardıń qatarına kiredi. Usı esittiriwlerdi tayarlaw procesinde respublikamızdıń derlik barlıq rayonlarında, eń shetki awıllarında bolıp, eki-úsh kúnlep qonıp qalǵan waqıtlarımız júdá kóp bolǵan. Jurnalistika mine usınıń menen áhmietli. Sebebi, jumıs procesin óz kózimiz benen kórip, waqıya ornınan sáwbetler, ocherkler, reportajlar tayarlaymız. Aytıp ótiw orınlı, jurnalist hár bir tarawdan xabardar bolıwı kerek. Jumısım dawamında esittiriwler tayarlaw menen birge tarawlardı da tereń úyreniwge kiristim. Prezidentimiz tárepinen qabıl etilgen párman hám qararlardıń, rásmiy hújjetlerdiń mazmun-mánisin ańlaǵan halda, olardıń tiyisli tarawlar hám aymaqlar kesiminde orınlanıwına ayrıqsha itibar qaratamız. Húkimet qararlarınıń orınlanbay atırǵan bólimlerin esittiriwlerimiz arqalı sın astına alıp, tiyisli xızmetkerlerdiń jumısındaǵı kemshiliklerdi dúzetiwge háreket etip atırmız. Búgin radiodaǵı jumısımdı juwmaqlar ekenmen, álbette, ózime haqılı soraw beremen. “Búgin tıńlawshılar ushın ne bere aldıq?,” “Olar usı kórsetiwlerden qanaatlanbaqta ma?,” “Olarǵa elimizdegi jańalıqlardı, xabarlardı óz waqtında jetkerip bere almaqtamız ba?.” Álbette, Qaraqalpaqstan radiokanalınıń 107,8 radiotolqını arqalı efirge berilip atırǵan hár bir esittiriwlerde usı jerde jumıs alıp barıp atırǵan dóretiwshilerdiń, jurnalistlerdiń, texnikalıq xızmetkerlerdiń ayanbay miyneti, izlenisleri kóz aldımda sáwlelenedi. Búgingi kúnde Qaraqalpaqstan radiosında mámleketimizdiń jámietlik-siyasiy, ekonomikalıq turmısındaǵı áhmietli jańalıqlar, hár bir tarawdaǵı ózgerisler, keń kólemli reformalar menen bir qatarda mádeniy, kewilashar esittiriwler de berip barılmaqta. Ásirese, janlı efir waqtında adamlarımız benen jaqınnan sáwbetlesseńiz olardıń arzıw-nietleri, keleshek rejeleri, xalqımızdıń abadan turmısı jolında alıp barılıp atırǵan jańalanıwlardan, reformalardan kewli tolıp atırǵanına jáne bir márte isenim payda etesiz. Aytıńshı, jurnalist ushın bunnan artıq kúsh, ilham bar ma?! Biz ideyanı da, ilhamdı da mine usı ápiwayı xalıqtıń ishinen alamız. 27-iyun – Baspasóz hám ǵalaba xabar quralları xızmetkerleri kúni aldınan Qaraqalpaqstan Respublikası Joqarǵı Keńesi tárepinen “Watan pidayısı” kókirek belgisi menen sıylıqlanǵanımnan oǵada quwanıshlıman. Bul tán alıw, álbette, pútkil Qaraqalpaqstan radiokanalında jumıs alıp barıp atırǵan jurnalist dóretiwshilerdiń jetiskenligi dep bilemen. Bunday itibar hár bir dóretiwshige jańasha ruwx, kúsh-ǵayrat penen islewde jáne de úlken kúsh baǵıshlaydı, juwapkershiligimizdi arttıradı. Muzaffar Toreev, Qaraqalpaqstan radiokanalı “Sociallıq-siyasiy hám ekonomikalıq baǵdarlamalar” Bas redakciyası aǵa redaktorı, “Watan pidayısı” kókirek belgisiniń iyesi.