ELLIKQAL’A RAYONÍNDA mámleketimizde jańa sistema hám qatnas – “Zarbdor tájiriybesi” tiykarında ekonomikalıq ósiwdi támiyinlew, bar imkaniyatlar menen rezervlerdi anıqlaw, olardı nátiyjeli iske qosıw arqalı xalıqtıń dáramatların arttırıw jáne jańa jumıs orınların jaratıwǵa qaratılǵan bir qatar joybarlar ámelge asırılmaqta. Sonıń ishinde, rayondaǵı Nawayı awıl puqaralar jıyını aymaǵında jasawshı Hamdam Saydabdullaevtıń shańaraǵında bahası 450 million sumlıq joybar sheńberinde qusshılıq (túequs), sharwashılıq, balıqshılıq hám diyqanshılıq shólkemlestirildi. Sonnan qusshılıqta jılına 150 million, sharwashılıqta 30 million, balıqshılıqta 30 million, baǵshılıqta 20 million, jámi 230 million sum sap dáramat almaqta. Búgingi kúnde 15 bas qaramal, 30 bas túyequs shóje, 2 mıńǵa shamalas balıq shabaǵı baǵılmaqta. – Túyequs baǵıp atırǵan fermerlerdiń jumısı menen sociallıq tarmaqlar arqalı tanısıp, usı jumısqa qol urıwdı maqset ettik, – deydi jumısshı Zarifboy Atajanov. – Sonnan Ferǵana wálayatınıń Rishtan rayonınan altı túequs alıp kelip jumıs basladıq. Házir olardıń sanı 30 basqa jetti. Túyequs júdá tez kóbeyetuǵın, keselliklerge shıdamlı, immuniteti joqarı haywan bolıp esaplanadı. Onı baǵıwdan maqset xalıqtıń densawlıǵına paydalı bolǵan gósh jetistiriwden ibarat. Úyimizdegi eki inkubatorǵa qoyılǵan máyekler 38-45 kún átirapında shóje shıǵaradı. Palapanları 1 million 500 sum átirapında satılmaqta. Jaqsılap kútilse, shóje bir jılda 50 kilogrammǵa shekem gósh beredi. Házirgi waqıtta ónimlerdi mámleketimiz wálayatlarına jáne respublikamızdıń qala hám rayonlarına jetkerip bermektemiz. Jaqında Rossiya Federaciyasına eki bas túyequs hám máekler eksport etildi. Túequstıń góshi hám mayı da insan salamatlıǵına paydalı ekenligin esapqa alıp, keleshekte rayonımızdaǵı mektepke shekemgi bilimlendiriw shólkemlerine shártnama tiykarında jetkerip beriwdi maqset etkenbiz. Nawayı awıl puqaralar jıyınındaǵı hákim járdemshisi Bunyodbek Qwchqorovtıń atap ótiwinshe, Hamdam Saydabdullaev shańaraǵınıń túyequs baǵıw baslaması búgingi kúnde aymaq turǵınlarında úlken qızıǵıwshılıq oyatpaqta. M.HABIBULLAEV, avtor alǵan súwretler.