Abdurashidova Muazzazxon Diyorbek qızınıń sporttaǵı dáslepki tabısı haqqında

Balalıq – arzıw-ármanlar qanat jayatuǵın, dúnyanıń eń pák hám ráńbáreń sezimleri júrekti erteklerge isendiretuǵın biybaha dáwir. Bul dáwirdiń haqıyqıy gózzallıǵı hám mazmunı tek ǵana biyǵam dem alıwda emes, al hár bir kúndi paydalı hám jaqsı ámeller menen bayıtıwda kórinedi. Ásirese, jazǵı dem alıs kúnlerinde sporttı ózine joldas etken balanıń ruwxıy dúnyası da bekkem boladı.

2016-jılı Tashkent qalasında dúnyaǵa kelgen Abdurashidova Muazzazxon Diyorbek qızı mine usınday pák, maqsetke umtılıwshań hám qábiletli jaslardan biri bolıp esaplanadı. Ol házirgi waqıtta Tashkent qalası, Shayxontohur rayonındaǵı 34-sanlı ulıwma bilim beriw mektebinde bilim almaqta. Muazzazxan mekteptegi sabaqların sport shınıǵıwları menen úylestirip, hám bilimlendiriwde, hám gimnastikada joqarı nátiyjelerge erisiwge umtılıp kelmekte. Ol ele júdá jas bolıwına qaramastan, kózlerindegi isenim hám sportqa bolǵan sheksiz mehri menen zamanlaslarınan ajıralıp turadı.

Bıyılǵı jazǵı dem alıs Muazzazxannıń ómirinde umıtılmas waqıyalarǵa bay boldı. Ol dem alıs kúnlerin biytákirar tábiyatı hám bay tariyxıy miyrası menen dańqqa erisken Qaraqalpaqstan jerinde ótkerdi. Aralboyınıń ózine tán kórinisleri hám miymandos adamları jas qızdıń júreginde óshpes tásir qaldırdı. Muazzazxan sayaxatqa shıǵıwdı súyikli sport túri bolǵan gimnastika shınıǵıwları menen sheberlik penen birlestirdi. Dem alıs dawamında ol turaqlı túrde shınıǵıp, óz sheberligin arttırıw hám quramalı elementlerdi puqta ózlestiriwge háreket etti.

Gimnastika – gózzallıq hám erk-ıqrardıń tolıq únlesligi. Biraq bul gózzallıq artında mıskallap jıynalatuǵın mashaqatlı miynet turadı. Bir ǵana háreketti jetik orınlaw, iyiliwsheńlik hám teńsalmaqlılıqtı joqarı dárejege jetkeriw ushın saatlap tınımsız shınıǵıw talap etiledi. Muazzazxan mine usınday mashaqatlardan seskenbey, jazdıń ıssı kúnlerinde de sheberligin arttırıwdan toqtamadı.

Mine, usı tınımsız miynet óz nátiyjesin kópke shekem kútpedi. Jazǵı dem alıs dawamında Beruniy rayonında ótkerilgen gimnastika boyınsha jarıs jas sporchı ushın dáslepki qatań sınaqqa aylandı. Muazzazxan óziniń puqta tayarlıǵı, háreketlerindegi shaqqanlıǵı hám maydandaǵı isenimli shıǵıwları menen tóreshiler hám tamashagóylerdiń itibarına ie boldı. Bellesiwler juwmaǵına bola, ol sıylı 2-orındı qolǵa kirgizdi. Bul tabıs muzıka hám háreketlerdiń artında tógilgen mańlay ter, tınımsız umtılıs hám úlken maqsetlerge qoyılǵan birinshi isenimli qádem bolıp esaplanadı.

Álbette, sporttaǵı hár bir jeńistiń artında mehriban ustazlar hám shańaraqtıń qollap-quwatlawı turadı. Muazzazxannıń sportqa bolǵan isenimin jalınlatqan ata-anası hám trener ustazlarınıń úlesi sheksiz.

Fotima QALANDAROVA.