Президентимиз 29 сентябрь куни Самарқанд шаҳрида бўлиб ўтган Бутунжаҳон шахмат олимпиадаси ва 3-парашахмат олимпиадасида тарихий ғалабани қўлга киритган Ўзбекистон терма жамоаси аъзолари, уларнинг ота-оналари ва мураббийлари билан учрашган эди.
Самарқанд шаҳрида ўтказилган 46 – Бутунжаҳон шахмат олимпиадаси ва 3-парашахмат олимпиадасида дунёнинг 200 дан зиёд мамлакатларидан 2 мингга яқин энг кучли ва машҳур гроссмейстерлар, номдор жамоалар иштирок этди.
Эътиборлиси, ушбу нуфузли олимпиадада юртимиз шарафини ҳимоя қилаётган Ўзбекистон терма жамоаси аъзолари ғолибликни қўлга киритишди.
Шунингдек, мусобақада парашахматчилар ҳам муносиб иштирок этиб, мамлакатимиз тарихида илк бор бронза медалини қўлга киритдик. Мен ҳам ушбу олимпиадада шахсий ҳисобда иккита – кумуш ва бронза медалига сазовор бўлдим.
Албатта, бу ўз-ўзидан бўлмайди. Бунинг учун тинимсиз меҳнат, ҳаракат лозим. Рақибларимиз кучли эди. Аммо, биз уддаладик!
Муросасиз кечган ҳал қилувчи 7-тур баҳсларида Ўзбекистон -1 жамоаси кучли рақиб – Исроил терма жамоаси устидан 2,5:1,5 ҳисобида ишончли ғалабага эришдик. Турнир якунида Ўзбекистон парашахматчилари терма жамоаси 11 очко билан 3-ўринни олишга муваффақ бўлдик.
Мана шундай юксак натижаларга эришишимиз албатта, Президентимизнинг биз ёшларни ҳар томонлама қўллаб-қувватлаши ҳамда яратиб берилаётган кенг имкониятлар самарасидир.
Мен Президентимизнинг шахмат бўйича Ўзбекистон терма жамоаси аъзоларига йўллаган табригидан жуда руҳландим. Айниқса, “Сизлар –Янги Ўзбекистон қаҳрамонлари, жаҳон шахмат оламида янги тарих яратган олтин авлодсиз. Бутун халқимиз сизлар билан чексиз фахрланади, ғурурланади”, – деган сўзлари барча шахматчиларга келгуси мусобақаларда янада юксак натижалар кўрсатишга шижоат берди. Албатта, бу бизга билдирилган юксак ишонч ва масъулият, қолаверса, келгусида янада яхши натижаларга эришишимизда катта куч бағишлайди.
Давлатимиз раҳбарининг шахматчиларни табриклашга бағишланган тантанали тадбирда мен ҳам жамоа аъзоси сифатида иштирок этиб, Президентимиз билан учрашишдек катта орзуларимдан бирига эришдим. Давлатимиз раҳбарига “Мен Сизнинг қорақалпоғистонлик қизингиз, фарзандингизман”, – дедим фахр ва ғурур билан. Шунингдек, мулоқот давомида Президентимизнинг Қорақалпоғистонга бўлган ташрифи Қорақалпоғистон ёшлари учун катта эътибор эканини таъкидлаб, қорақалпоғистонлик ёшлар номидан миннатдорлик билдирдим.
Президентимизнинг Фармонига мувофиқ “Мардлик” ордени билан тақдирландим. Қолаверса, учрашувда Президентимиз биз шахматчиларнинг меҳнатларини алоҳида эътироф этди. Volkswagen автомобили, икки хонали хонадон ва 50 минг АҚШ доллари миқдоридаги пул мукофотини шахсан ўзи топширди.
Айтинг, мана шундай олижаноб давлат раҳбари, мана шундай фарзандлари улуғланган юрт яна қайда бор?!
Бу Янги Ўзбекистон, Учинчи Ренессанс, келажаги буюк давлат барпо этишга интилаётган, бу йўлда ўғил-қизларини қўллаб-қувватлаётган муҳтарам Президентимизнинг биз ёшларга кўрсатаётган оталарча ғамхўрлиги, эътиборидир. Биз бундан жуда хурсандмиз. Шу ўринда менга билдирилган юксак ишончи ва эътибори учун Президентимизга чексиз миннатдорлик билдираман.
Шуни алоҳида таъкидлашни истардимки, ушбу юксак мукофотга эришишимда устозим Айна Тораеванинг меҳнатлари катта. Шу ўринда, мени қўллаб-қувватлаган, менга ишонч билдириб янги марраларга руҳлантираётган Президентимизга, устозларимга, ота-онамга миннатдорлик билдираман.
Келажакда янада яхши натижалар билан юртимиз нуфузини оширишга ваъда бераман.
Селби Какишова,
46 – Бутунжаҳон шахмат олимпиадаси ва 3-парашахмат олимпиадаси иштирокчиси,
“Мардлик” ордени соҳибаси.
