Búgingi kúnde sociallıq tarmaqlar turmısımızdıń ajıralmas bólegine aylandı. Kópshilik jańalıqlardı televizor yamasa gazeta arqalı emes, al “Telegram,” “Instagram,” “Facebook” sıyaqlı platformalar arqalı qabıl etedi. Sol sebepli málimleme qısqa waqıt ishinde keń auditoriyaǵa jetip barmaqta.

Sociallıq tarmaqlardıń eń úlken abzallıǵı – informaciyanıń operativligi hám qamtıw kóleminiń keńligi. Paydalanıwshılar jańalıqlardı tezlik penen baqlap barıw imkaniyatına iye. Ayrıqsha jaǵdaylarda, mısalı tábiyǵıy apatshılıqlar yamasa jol-transport hádiyselerinde, sociallıq tarmaqlar úlken áhmiyetke iye boladı, sebebi olar arqalı xalıq óz waqtında durıs háreket ete aladı.

Sociallıq tarmaqlar jámiyetlik turmısta da áhmiyetli orın iyeleydi. Kóplegen jámiyetlik shólkemler, jergilikli belsendiler hám jaslar hár qıylı sociallıq joybarlardı mine usı platformalar arqalı úgit-násiyatlaydı. Máselen, Qaraqalpaqstanda birinshi márte iske túsirilgen kinojurnal arqalı balalar jeke gigienaǵa ámel etiw, azanǵı dene shınıqtırıw hám kúndelikli salamat ádetlerdi qáliplestiriwdi úyrenbekte.

Biraq sociallıq tarmaqlardıń unamsız tárepleri de bar. Jalǵan hám tekserilip kórilmegen málimlemeniń tez tarqalıwı nadurıs túsiniklerdiń qáliplesiwine hám jámiyetlik qatnasıqlarǵa unamsız tásir kórsetiwi múmkin.

Juwmaqlap aytqanda, virtual dúnya zamanagóy dúnyanıń ajıralmas bólegi bolıp, qadaǵalawsız paydalanıw ruwxıy hám fizikalıq salamatlıqqa unamsız tásir etedi. Sonlıqtan, virtual dúnyadan payda alıw ushın onnan aqıl menen hám ólshemli paydalanıw zárúr.

Gózzal JIYENBAEVA,

Qaraqalpaq mámleketlik universitetiniń

2-basqısh magistrantı.