Яқинда кафедрамизнинг бир гуруҳ ўқитувчилари, жумладан тарих фанлари номзоди Даулетбой Бекбаулиев, доцент Зияда Қожиқбоева, кафедра мудири Злиха Уразимбетова, ассистент ўқитувчи Қумар Бегниязова, шунингдек, “Турон-24” ахборот  агентлиги мухбири Дилафруз Айтбаева, Нукусда амалиёт ўтаётган Ўзбекистон жаҳон тиллари университетининг халқаро журналистика факультети битирувчиси Айжамал Жолдасбаевалар билан биргаликда янгидан очилган ўқув масканида меҳмон бўлдик.

Аввалги дизайн коллежининг биносига жойлашган университет дарвозасидан кираверишда қоровул бизни тўхтатиб, “талабалар ўқияпти, ташқаридаги суҳбатлашиш жойида кутиб туринг, сиз сўраган кишини чақирамиз” деди. Бизларни проректор Ф.Мўминов кутиб ўтирганини, ректор билан учрашув белгиланганлигини айтганимиздан сўнг ўқув биносига киришга рухсат берди.

Кўмкўк байроқчалар ҳилпираб, яшил майсалар ва гулларга бурканиб турган  майдонда уч қаватли икки бино жойлашган. Ўртада ёзги кинотеатр. Мўжазгина ҳовузда балиқлар эркин сузиб юрибди. Бизлар ректор Ш.Қудратходжаев раҳбарлигидаги “команданинг” қисқа фурсат ичида амалга оширган ишларини кўриб лол қолдик. Улар Муҳтарам Президентимиз қарори қабул қилинган сана- жорий йилнинг 24 май кунидан бошлаб тиним билмасдан журналистлар тайёрлайдиган янги даргоҳни яшнатиб юборибди. Ўқув аудиториялари, китоб ўқиш заллари, теле, радиостанциялар, кино, фотолабораториялар замонавий услубда жиҳозланган. Суҳбатлашиб, дам олиб ўтирадиган файзли жойлар, интернетда дунё билан тиллашадиган шароитлар мужассам. Ҳатто, университетнинг байроғи, мадҳияси ҳам яратилибди. Энг аҳамиятлиси, ўқишга, журналистикага иштиёқи баланд, Ватан учун фидойи хизмат этишга бел боғлаган билимли, иқтидорли ёшларни танлаб олишга эришилибди.

Бизларни дастлаб фан ва инновациялар бўйича проректор, профессор Файзулла Абдуллаевич Мўминов, ўқув ишлари бўйича проректор, филология фанлари номзоди  Алишер Матяқубов, факультет декани, филология фанлари номзоди Назима Мурадова ва бошқалар илиқ  кутиб олишди.

Профессор Ф.Мўминов энг муҳим янгилик сифатида университет қошида ихтисослаштирилган  илмий кенгаш очилганлиги тўғрисидаги Олий аттестация комиссиясининг қарорини кўрсатди. Кенгашга биринчилар қаторида август ойида ассистент ўқитувчимиз Жангабой Марзияевнинг кафедрамизнинг кенгайтирилган мажлисида муҳокама қилинган Қорақалпоғистон матбуотида экология мавзусининг ёритилишига бағишланган филология фанлари бўйича фалсафа доктори  илмий унвонини олиш учун ёзган докторлик иши келиб тушганлигини айтди. Профессор ўзининг дастлабки фикри  ижобий эканлигини, энди бошқа мутахассисларнинг фикрини билиш зарурлигини айтганида, қувончдан барчамиз қарсак чалиб юборибмиз!

Файзулла Абдуллаевич одатдагидай  ҳар биримизнинг ҳол-аҳволимиз, кафедрада кимнинг қандай ишлар билан машғул эканлиги билан қизиқди. Профессорнинг илмий раҳбарлигида қорақалпоғистонлик А.Абдимуратов, Қ.Қалекеев, П.Алламбергенова ва бошқа қатор муаллифлар номзодлик, докторлик ишларини ҳимоя қилди, шунингдек у қорақалпоқ журналистикасини илмий кадрлар билан таъминлашга узоқ йиллардан буён жон куйдириб, ғам­хўрлик қилиб келмоқда, бир неча марта Нукусга келиб, талабаларга маърузалар ҳам ўқиган…

Котиба қиз ректорнинг келганлигини хабар қилди.

Сиёсий фанлар номзоди  Шерзодхон Тажетдинович Қудратходжаев бизларни ўз хонасида қабул қилди. У  билан Ўзбекистон журналистикасининг бугунги ҳолати ва келажаги, Президентимизнинг журналистлар  олдига қўйяётган вазифалари тўғрисида қисқача фикрлашдик. “Сизларни икки минут эмас, икки кун тинглашга тайёр эдим, аммо ҳозир зарур ишларим бор, проректорларимиз сизларни университетнинг ўқув жараёни билан таништиради” деди ва эсдалик учун суратга тушдик.

— Бизларни ҳам қаторингизга қўшинг, бирга ривожланайлик! — дедим ректорга ҳайрлашиш олдидан. Бу сўз оғзимдан беихтиёр чиқиб кетди.

— Албатта! — деб жавоб берди у ишонч билан.

* * *

Шерзодхон бизга мақолалари, интернет журналистикасига бағишланган ўқув қўлланмаси ор­қали таниш эди. 2017 йил февраль ойида у ЎзМУ нинг “Матбуот” кафедраси раҳбари  лавозимига тайинланди. Шундан сўнг у менинг докторлик  илмий ишим билан танишиб чиқди, нашрдан чиққан мақолаларимни ўрганди, ўз вақтида  ҳимоя қилишим учун ғамхўрлик қилди.

Шундай қилиб, Ўзбекистонда журналистика соҳасидан биринчи бўлиб филология фанлари бўйича фалсафа доктори даражасини олишимда у киши кафедра мудири сифатида ўз ёрдамини аямади. Шерзодхон Тажетдинович кейинчалик ҳам мамлакатимиздаги янгиланишлар ва “Халқаро пресс клуб” билан боғлиқ аҳамиятли ишларнинг бошида туришига, вақти тиғиз бўлишига қарамасдан, менинг учун вақт ажратди, докторлик илмий ишимнинг мавзуси бўйича бир неча марта савол-жавоблар ўтказди. Илмий ишимни бажара олишимга ишонч ҳосил қилганидан сўнг кафедранинг, ихтисослашган  Илмий кенгашининг семинар-мажлисларида илмий ишим муҳокамаси жараёнида ўз фикрлари билан фаол иштирок этди. Натижада 2017 йил 15 декабрда докторлик илмий ишимни вақтидан аввал ҳимоя қилдим. Албатта, бунда ЎзМУ ректори А.Марахимов билан Тошкент Шарқшунослик институтининг ректори А.Маннанов, журналистика факультетининг декани М.Мирсоатова ва бошқа тошкентлик, нукуслик илм фидойиларининг қўллаб-қувватлаши алоҳида бўлди.

Буларни айтмасам бўлмас, “Яхшининг яхшилигини айт, давлати тошсин” деган ибора бор. Мен тошкентлик илм фидойиларида  юксак маданият ва инсонийлик фазилатларини кўрдим, Ибрайим Юсуповнинг нима учун “Мен Тошкентни соғинаман кўрмасам”, “Мустақиллик майдонидан ўтганда” деб мадҳ этаверганининг маъносини энди ҳис қилгандек бўлдим.

* * *

Ўқув ишлари бўйича проректор Алишер Матяқубов ва факультет декани Назима Мурадовалар ҳам журналистикани чуқур тушунадиган, ўзбек тили билан бирга бошқа тилларни яхши ўзлаштирган, ўз ишининг жонкуяри, кўнгли тоза, меҳнатсевар, ҳақиқатгўй, шунинг билан бирга камтарин, талабаларга ғамхўр устозлардир. Тошкентда ўқиган уч йил ичида улар ҳақида жамоатчиликдан фақат яхши гапларни эшитдим.

Германия биринчилардан бўлиб ҳамкорлик қилишга хайрхоҳлик билдирди ва Дойче Велле университети бир ҳафталик ўқув-семинарларини ўтаётган экан. Япония, Хитой, Туркия, Москва, Санкт-Петербург университетлари билан ҳам ўзаро ҳамкорлик йўлга қўйилган, бошқа чет давлатларнинг элчилари Ўзбекистонда сўз эркинлиги ривожланишига ишонч билдиришмоқда. Ўзимизда нашрдан чиққан, журналистика соҳасига тегишли кўпгина китоб­ларни кўрдик. Энг аҳамиятлиси, талабаларнинг кўзларида янгиликка, билим олишга иштиёқ сезилиб турарди! Ўқитувчиларда шижоат, куч-қувват тўлиб-тошмоқда.

Шу куни иқтидорли ёш Дилафруз Айтбоева шартнома асосида ўқишни давом эттириш ниятини билдириб, магистратурага қўшимча қабул қилишни сўраб  ректор номига ариза ёзди, сабаби у Нукусда “аъло” баҳоларга ўқиган, ёш журналистлар танловларида ғолиб бўлган, шунингдек, инглиз тилини ҳам яхши ўзлаштирган ва кириш имтиҳонларида ўз билими билан 184 балл тўплаган эди.

* * *

Буларнинг барчасини нима учун ёзаяпман? Уларнинг бағрикенг инсонлар эканлигини билганлигим учун, истеъдодли ёшларни қўллаб-қувватлашига, илмнинг, журналистиканинг ривожланиши тарафдорлари эканлигига, замонавий журналистлар тайёрлашда жон куйдиришига, Ўзбекистон ­халқига пок ният билан хизмат қилишига ишонганлигим учун ёзмоқдаман.

Бундан бир неча йил муқаддам тиббиёт, қишлоқ хўжалиги, ахборот технологиялари, саънат факультетлари университет таркибидан ажралиб, Тошкентдаги тегишли олий ўқув муассасаларининг филиаллари бўлди. Ҳозирги вақтда уларнинг ҳаммаси ҳам мутахассис тайёрлашда ўз ўрнига эга бўлди. ҚДУ таркибидаги журналистика бўлимини ҳам  бугунги кунда етакчи ўқув муассасаси ҳисобланган,  МДҲ давлатлари орасида ягона ихтисослаштирилган университетнинг Нукус филиалига айлантирилса, қорақалпоқ журналистикасининг ривожланишида алоҳида аҳамият касб этган бўлар эди. Ахборот асри талабларидан келиб чиқиб ривожланиш йўлини танлаган тўғри эмасми, буни чўзиб ўтириш шартми, деган ўйлар тинчлик бермади.

Нукусга келганимиздан кейин кўрган-билганларимизни катта- кичик дўстларимизга гапириб бердик. Сабаби, халқимизга, дунё ҳамжамиятига янгиликлар узатишнинг, уни етказиб беришнинг сифатини яхшилаш вақт кутиб турмайди. Ҳурматли Президентимиз Ш.Мирзиёев ўз маърузаларида: “Оммавий ахборот воситалари аҳолининг талаб ва эҳтиёжларини ҳокимият идораларига етказишнинг муҳим ва таъсирчан воситасига,  халқнинг энг яқин кўмакчиси ва ҳамдардига, демократия кўзгусига  айланиши зарур” дея таъкидлаган эди. Ўзбекистонда журналистикани тубдан янгилаш, уни янги замон  нигоҳидаги  ёш, етук кадрлар билан таъминлаш талаб этилаётган  экан, Қорақалпоғистон Республикасида ҳам информация жамиятига кундан-кун жадал қадам ташлаётган матбуот ва оммавий ахборот воситалари учун замонавий мутахассислар тайёрлашни йўлга қўйиш вақти келди.

Тамара Машарипова,

Бердақ номидаги Қорақалпоқ давлат университети журналистика кафедраси  катта ўқитувчиси, филология фанлари бўйича фалсафа  доктори  (PhD).