Hár bir máhálleniń ózine tán kórinisi hám nápesi boladı. Tórtkúl rayonındaǵı Beruniy mákan puqaralar jıyını degende kópshiliktiń kóz aldına miynetkesh isbilermenler hám qolı gúl ónermentler keledi. Mine usınday payızlı ortalıqqa haslı “Shadlıq” máhállesinde ósken Aysultan Allamova kelin bolıp tústi. Úlken hám tártipli shańaraqta kelinlik wazıypasın shın kewilden atqarǵan Aysultan apa shańaraqlıq qádiriyatlardı hámme nárseden ústin qoydı. Ómirlik joldası Aybek aǵa menen birgelikte eki ul hám bir qızdı elge sadıq, miynetkesh insanlar etip tárbiyaladı.

Qaharmanımız tábiyatındaǵı kúshli erk-ıqrar hám átirapındaǵılarǵa payda keltiriw tilegi bir kúni jańa bir qayırlı joybarǵa túrtki boldı. Shańaraq aǵzaları 2024-jılı óz byudjetine tayanǵan halda hayal-qızlar sumkasın islep shıǵarıwdı jolǵa qoydı. Shańaraqtıń úlken ulı Bekzad bul ónerdiń sırların Namangan hám Tashkenttegi tájiriybeli ustalardan qunt penen úyrenip qayttı. Kóp ótpey, olar tayarlaǵan ónimlerge bolǵan buyırtpalar hám qarıydarlar aǵımı keskin kóbeydi.

Insannıń nieti qalıs bolsa, jumısında ónim, ómirinde bereket boladı. Aysultan apanı qısqa waqıtta bunday joqarı nátiyjelerge erisiwdiń sırı haqqında soraǵanımızda, ol biraz oylanıp, bılay dedi:

– Menińshe, bul tabıstıń tiykarında bárinen burın shańaraqlıq awızbirshilik jatır. Xalqımızda “Kópten qoyan qashıp qutılmas,” degen dana naqıl bar. Eger shańaraqta hámme bir jaǵadan bas shıǵarıp, bir maqsetke qaray umtılsa, jumıs bárqulla sulıw bola beredi. Eger birlik bolmasa, hár kim hár tárepke tartsa, kútilgen nátiyjege erisip bolmaydı, – deydi Aysultan apa múlayımlıq penen. – Jumısımızdı baslawımızǵa jáne bir áhmietli faktor sebep bolǵan. Ulım Bekzad jaqınlarımızdan birine donorlıq etken edi. Den sawlıǵın tiklep alıwı ushın oǵan belgili bir waqıtqa shekem waqtınsha jeńilirek jumıs kerek edi. Shańaraqlıq keńesip, tigiwshilik penen shuǵıllanıwǵa qarar ettik.

Jumısımız jolǵa qoyılǵannan soń, onı keńeytiw hám jańa stanoklar satıp alıw ushın mámleketten 50 million sum jeńilletilgen kredit aldıq. Sumkalardı bezew ushın aksessuar hám kerekli shiyki zatlardı Tashkentten alıp kelemiz. Ullarım Bekzad hám Dilshad hár ayda keminde 500-600 sumka pishse, 4 jumisshiımız olardı 20 kún átirapında sapalı etip tigip shıǵaradı. Ónimlerimizdi ishki bazardan arttırıp, Tashkent qalası, Samarqand hám Buxara wálayatlarına da jetkerip berip atırmız. Búgingi kúnde kredit tólemlerin juwmaqlaw aldında turmız. Keleshekte tigiwshilik cexımızdı jáne de keńeytiw nietindemiz.

Ónermentler awqamı menen birgelikte shákirtler tayarlaw da jolǵa qoyılǵan. Atap aytqanda, sheber ónerment bolıp jetisken Iroda Zaripova hám Mohira Kamoladdinovalarǵa arnawlı sertifikatlar tapsırıldı.

May ayında bul isbilermen hám miyrim-shápáátli shańaraqqa jáne bir jaqsı xabar kirip keldi: Tájievlerdiń shańaraǵı “Eń úlgili shańaraq” tańlawınıń Qaraqalpaqstan Respublikası basqıshında jeńimpazlar qatarınan orın aldı.

Óz jolın, óz maqsetin tapqan haqıyqıy miynet misli aǵıs ózegin tapqan jedelli dárya sıyaqlı. Ol barǵan jerin gúlzarǵa, bostanǵa aylandıra beredi.

Munavvara YUSUPOVA,

Tórtkúl Málimleme kitapxana orayınıń fondtı toltırıw, saqlaw hám qayta islew beriw xızmetiniń baslıǵı.