Xalqımızda “Sawaplı isti hár kim, hár kúni islewi kerek” degen hikmet bar. Haqıyqatında da, insannıń el-jurt mápi jolında islegen iygilikli isleri tek ǵana adamlardıń kewline jıllılıq baǵıshlap qoymastan, al jámiette miyrim-shápáát hám awızbirshilik ortalıǵın bekkemleydi.

Ásirese, kishipeyillik penen qayır-saqawat jumısların ámelge asırıp atırǵan insanlar aramızda kóp ekenligi quwanıshlı. Olar ózleri haqqında jar salǵısı kelmese de, xalıq mápi ushın islengen bunday iygilikli isler elge ibrat bolatuǵını sózsiz.

Biz sóz etpekshi bolǵan insan áne usınday sawaplı, keńpeyil jerleslerimizden biri isbilermen, “AIDA-S” shańaraqlıq kárxanasınıń direktorı Uluǵbek Bobojonov bolıp esaplanadı.

Bárinen burın, onıń tárbiyası hám ómir jolında áhmietli orın tutqan ákesi – Rustam Bobojonov haqqında toqtap ótiw orınlı. El arasında húrmetke erisken bul insan ómiri dawamında hadal miyneti, adamgershiligi hám saqawatı menen kópshilikke úlgi bolıp jasadı. Qońsı-qobalarǵa járdem qolın sozıw, mútájlerdi qollap-quwatlaw, jaslarǵa násiyat beriw onıń turmıs tárizine aylanǵan edi.

Rustam Babajanov ómirlik joldası Sara Djabborbergenova menen birgelikte 8 perzentti tárbiyalap kamalǵa keltirdi. Olardıń barlıǵı hár qıylı tarawlarda nátiyjeli miynet etip, jámiettiń rawajlanıwına múnásip úles qosıp kelmekte.

Marhum atanıń “Joldı bekitpe, qolıńnan kelgeninshe sawap isle, kópir qurıp ber” degen násiyatı Uluǵbek Babajanovtıń ómir mazmunına aylanǵan.

Mine, usı iygilikli wásiyat tiykarında aymaqtaǵı “Bayterek” hám “Murtazabiy” máhállelerin baylanıstırıp turatuǵın Tasjap ańǵarınıń ústindegi kópirdi zamanagóy kóriniste qayta qurıw baslaması ámelge asırıldı.

Qurılıs jumıslarına máhálledegi tájiriybeli ustalar tartılıp, Shuhrat Sobirov basshılıǵında arnawlı brigada qáliplestirildi. Behzod Atamuradov, Davlatbay Ayapov, Bayram Saparov, Paraxat Sarsenbaev, Ikram hám Salamat Eshonovlar, Baxtiyor Sultonov hám Murat Jumamuratov sıyaqlı pidayı ustalardıń miyneti menen qısqa múddette zamanagóy hám bekkem kópir qurıldı.

Búgin bul imarattan paydalanıp atırǵan máhálle xalqı, ásirese, jaslar hám kekseler bul qayırlı jumıstan razı. Kópir tek ǵana eki máhálleni emes, al adamlardıń kewlin de jaqınlastırdı.

Bul sawaplı iste ruwxıy járdem hám másláhátleri menen qatnasqan máhálle baslıǵı Aybek Tájimuratov, kóshe baslıǵı Polat Nurlepesov, máhálle puqarası Mahmud Matkarimov hám basqa da belsendilerdiń úlesi de ayrıqsha itibarǵa ılayıq.

Sonday-aq, qurılıs procesinde kerekli materiallar menen úzliksiz támiyinlewde “Qurılıs jay” (“Stroy dom”) qurılıs materialları dúkanı baslıǵı Uluǵbek Allambergenov ta belsene qatnastı. Ol da qayırlı baslamadan shette qalmastan, óz úlesin qostı.

Qurban hayıtı qarsańında ámelge asırılǵan bul iygilikli baslama xalqımızǵa tán keńpeyillik, awızbirshilik hám saqawat pazıyletleriniń jáne bir ámeliy kórinisi boldı.

Furqat UTEMURATOV,

Ózbekstan Jurnalistler awqamı aǵzası, “Shuhrat” medalı, “Vatan fidoyisi” kókirek belgisi iyesi.